e... volin beštije, nađe se i zviri u životu mon. volin maške, pase, tiče, konja, tovara... volin stari spliski govor. kad sve to promišan i još kad mi u ruke dođe libar marka uvodića, ovod se stvori pari rigi citata  o' jednemu šjor tovaru. aj gren prinit ča je notano o ušima tega tovara. jerbo, puno me se dojmilo, e...

kako ćete znat je li tovar cili oli samo na bokuniće tj. mišanca o' beštije, a? po ušima, e... a da kako drugovačije, e...

"Kako je malo posla jema, a ' rane mu nij' falilo, to se on dosta uzobisti. Bi' je posta žestok i jogunast, živi tovar jedan. Nisi mu moga' taknit uši. Tišća' je puno do ušiju, ka' svi tovari, najskoli oni koji tišćidu uspravno uši, pa ne daju da in se uši tičedu. Jemadu u jušiman ka' niku anbic'jun, ka' diču se š njiman, a ko zna kako je to me'u njiman i zašto je to. Oni koji nisu cili tovari, jemadu obišno klepave uši, oni ništa, oni puščadu 'vatat za uši, ma ako su cili tovari, najskoli oni mali krušci, kojiman su uši malo i kraće, odmar navalidu zubiman i nogaman. Branu i' i  ne daju i' dirat, a more bit do kod nji' i jedan ka' ukras, niki ka' ornamenat, a jopet nisu in za ništa tako velike. Ko to more znat?"

izvor: Štorija jednega tovara - Drugi libar Marka Uvodića Splićanina

ekola, gren ča, jeman još tovarećih ušiju po libru (to mi je ka znak) di san sinjala čagod interesantno dok je duralo čitanje, pa ćemo kojon drugon zgodon još štagod prinit ovod. znan, čujen vas ča govorite,  grijota je po libru činit uši, ali ovi čovik je stvarno zna pisat, pa san malo označila, bolje i tako vengo vazest lapiš i mrčit, e...