e...

jeman rokovnik i u njega notajen SVE. tot se pišu sastanci,  sve privatne i poslovne obveze, dica ča stižu na poduke,  ostale stranke, firme u koje triba poč radit, firme kojima triba poslat ponudu, faze tekućih rmanjih  radova , ali i onih većih radova ča se zovu projekti - dokle se došlo, šta se zaključilo itd.

ne zakašnjavan jerbo u ti rokovnik uvik gledan i vodin računa da ispoštujen rokove i dogovore.

jeman mobitel i na njega mi arivaju i telefonski pozivi kad nisan u uredu. redovito se javljan kad me svit zove, a ako se ne stignen javit dok zvoni , nazoven čin uvatin vrimena. jeman i drugi mobitel kad je prvi isključen - neću se sakrit o' ciloga svita, oni ča me baš tribaju nač jemaju i taj broj.

jeman i škatulu o' kompjutera, služi mi za radit, ali priko nje komuniciran i sa sviton, na poštu nastojin odgovorit, čitan sve to dosta često. sad san nabavila i ovu prijenosnu da more svugdi poč sa menon.

znan da san savjesna peršona i da to u rvackoj opče nije dobro bit. zaradi tega ča svoje obaveze izvršavan, šta se na telefon odazivan, ča poštu čitan i ča ne nagomilavan obaveze vengo ih rješavan, masu puta mi se dogodi da mi svit reče: blago ti se, pa ti ništaaaaaaaaa ne radiš.

je, baš mi je lipo, za mene radi tamo niki nevidljivi rob koji ne triba njanci nešto izist, a pinezi mi sami stižu.

kako san obrazovanje smatrala bitnom stavkom u svom životu, onda san lipo i finila skule.  narafski, obrazovan čovik brže uči, na temelju onega ča zna lakše se uklapa u novo, intelektualna znatiželja je kod njega razvijenija, a poslove obavlja puno lakše o' čovika koji nije o' te vrsti, pogotovo ako osin svoje struke jema i informatička znanja te znanja stranih jezika.

kako svoje obaveze rješavan obrazovanin mozgom, narafski da me gre lakše. i sad, svako malo ti se javi neko ča reče: blago ti se, pa ti ništaaaaaaaaa ne radiš.

je, baš mi je lipo, za mene radi tamo niki nevidljivi rob koji ne triba njanci nešto izist, a pinezi mi sami stižu.

radin, narafski da radin, samo san našla svoj bokunić mista pod suncem u području znanja, a šta se u rvackoj radnikom smatra samo oni ča kopa  i facom samo oni ča šverca, e, to, to ja teško moren prominit.

zato ću lipo i ovod, na ovi internet priznat:

ši, xvii cili život gušta, a pinezi sami stižu. probajte i vi lipo tako, zaradi čega ne, ča ne bi vama pinezi stizali, a?